ПАРИЗ (АА) - Француските авиони пресретнаа „тоа што требаше“ за време на нападот на Иран врз Израел, изјави денес францускиот претседател Емануел Макрон, јавува Анадолу.

„Веќе со години имаме воена база во Јордан за борба против тероризмот“, рече Макрон за време на интервјуто за радиодифузерите „БФМТВ“ и „РМЦ“.

„Јорданскиот воздушен простор е нарушен со тие напади, а нашите авиони полетаа и го пресретнаа тоа што требаше да го пресретнат“, додаде тој.

Макрон нагласи дека потегот е направен за поддршка на Израел.

Иранската Исламска револуционерна гарда (ИРГЦ) лансираше голем број ракети и беспилотни летала кон Израел доцна во саботата како одговор на нападот на 1 април врз иранскиот конзулат во Сирија.

Според некои непотврдени извештаи, ИРГЦ истрелала повеќе од 300 беспилотни летала и проектили во нападот што траел неколку часа, а голем број од нив биле пресретнати од израелските системи за воздушна одбрана.

Постојат шпекулации дека Израел би можел да возврати, а експертите веруваат дека тоа може да предизвика сеопфатна регионална војна.