Лавров: Зголемена е можноста за жесток судир меѓу САД и Северна Кореја

МОСКВА (АА) - Министерот за надворешни работи на Русија, Сергеј Лавров, истакна дека значително е зголемена можноста за жесток судир меѓу Соединетите Американски Држави (САД) и Северна Кореја. Тој посочи дека ова може да предизвика сериозни последици, и оти тие како Русија ќе направат сѐ за да не се случи тоа, јавува Anadolu Agency (AA).

Лавров на еден настан во рускиот град Владимир даде оцена за тензиите меѓу САД и Северна Кореја.

Тој пренесе дека дијалогот меѓу САД и Северна Кореја достигнал до загрижувачко ниво. „Продолжува реториката на САД дека ќе ја погоди Северна Кореја, и на Северна Кореја дека ќе го погоди островот Гуам. Значително е зголемена можноста за жесток судир меѓу двете земји“, изјави Лавров.

Шефот на руската дипломатија истакна дека во случај да настане конфликт меѓу двете земји, ќе загинат голем број луѓе. „Ова може да предизвика сериозни последици. Ние како Русија ќе направиме сѐ за да не се случи тоа“, рече Лавров.

Тој нагласи дека Русија нема да прифати Северна Кореја да поседува нуклеарно оружје. „Сметаме дека треба да се земат предвид некои предлози што заеднички се понудени од страна на Русија и Кина за решавање на севернокорејската криза“, додаде Лавров.