Elena Teslova
27 Октомври 2022•Ажурирај: 28 Октомври 2022
МОСКВА (АА) - Русија е подготвена да ги обезбеди своите интереси на преговарачката маса со Украина, изјави денеска портпаролот на Кремљ, Дмитриј Песков, јавува Агенција Анадолија (АА).
Медиумите јавија дека рускиот претседател Владимир Путин испратил порака до својот украински колега Владимир Зеленски преку претседателот на Гвинеја-Бисао, Умаро Сисоко Ембало, поканувајќи го на дијалог во време кога војната во Украина влегува во деветтиот месец.
Говорејќи на прес-конференција во Москва, Песков рече: „Нашиот колега од африканската држава изрази желба, рече дека ќе контактира [со Зеленски] и дека ќе го пренесе ставот на Путин на украинската страна.“
„Нема конкретна порака во овој случај“, додаде Песков.
Портпаролот на Кремљ рече дека Путин го информирал Ембало за руско-украинските мировни преговори што се одржаа во март, дека речиси биле до постигнување договор кога украинската страна „исчезнала“, соопштила дека не сака да продолжи со преговорите и последователно усвои закон со кој се забранува украинската страна да води преговори со Русија.
„Во исто време, претседателот истакна дека таквото немање желба за преговарање и отфрлањето на веќе договорените спогодби јасно се случиле со наредба од Вашингтон“, истакна Песков и додаде:
„Сега, де факто, Русија го нема променето својот став, ние сме подготвени да ги обезбедиме нашите интереси на преговарачката маса, го сакаме тоа, но во овој случај станува збор за целосно немање волја од страна на Украина“, рече Песков.
На 24 февруари Русија започна, како што ја нарече, „специјална воена операција“ во Украина.
Во последните недели, украинските сили напредуваа во својата контраофанзива, а Москва повика поголем број резервисти и анектира четири украински региони преку референдуми, кои Западот ги нарече „лажни“.
