Кремљ: „Русија е крајно загрижена за ситуацијата на Блискиот Исток“

ИСТАНБУЛ (АА) - Кремљ денес соопшти дека Русија е „крајно загрижена“ за ситуацијата на Блискиот Исток во услови на неодамнешните тензии меѓу Иран и Израел, јавува Анадолу.

„Ние сме крајно загрижени поради ескалацијата на тензиите во регионот. Ги повикуваме сите земји во регионот да покажат воздржаност“, изјави портпаролот на Кремљ, Дмитриј Песков, на брифинг со новинарите во Москва.

Велејќи дека понатамошната ескалација во регионот не е во „ничии интереси“, Песков рече дека Русија се залага сите несогласувања да се решаваат со политички и дипломатски средства.

Иранската Исламска револуционерна гарда (ИРГЦ) лансираше низа беспилотни летала и проектили кон Израел доцна во саботата како одговор на нападот на 1 април врз иранскиот Конзулат во Дамаск.

Нападот, во кој загинаа седум ирански воени функционери, вклучително и висок командант на ИРГЦ, наиде на остри реакции кај иранските владини претставници, кои ветија „одлучен одговор“.

Според некои непотврдени извештаи, ИРГЦ истрелала повеќе од 300 беспилотни летала и проектили во нападот што траел неколку часа, од кои многу биле пресретнати од израелските системи за воздушна одбрана.

Сепак, командантот на ИРГЦ, генерал Хосеин Салами, за новинарите во Техеран во неделата наутро изјави дека операцијата била успешна повеќе отколку што очекувале.

Во меѓувреме, се шират шпекулации дека Израел може да одлучи да возврати, што експертите веруваат дека може да предизвика сеопфатна регионална војна.