Saadet Gökce
22 Септември 2025•Ажурирај: 23 Септември 2025
ИСТАНБУЛ (АА) - Севернокорејскиот лидер Ким Џонг Ун на парламентарен состанок истакна дека нема причина да се избегнува дијалог со САД доколку Вашингтон престане да инсистира на денуклеаризација, објави денес Корејската централна новинска агенција, пренесува Анадолу.
За време на говорот вчера во Врховното народно собрание, Ким рече дека сè уште има „убави спомени“ од американскиот претседател Доналд Трамп, од нивните три средби во периодот помеѓу 2018 и 2019 година.
Севернокорејскиот лидер, исто така, повтори дека нуклеарното оружје е „неизбежен избор“ за опстанокот на нацијата, нагласувајќи дека нема начин да се постигне денуклеаризација.
Светот веќе добро знае што прави Вашингтон откако една земја ќе се откаже од своето нуклеарно оружје и ќе се разоружи, рече Ким.
„Никогаш нема да се откажеме од нашето нуклеарно оружје“, додаде тој.
Ким, исто така, го отфрли обединувањето на двете Кореи, нарекувајќи го непотребно и обединување преку апсорпција, како и обидот на Јужна Кореја да ги затопли врските меѓу земјите.
Претседателскиот кабинет на Јужна Кореја, одговарајќи на говорот на Ким, истакна дека Сеул е подготвен да ги поддржи нуклеарните разговори меѓу Северна Кореја и САД доколку тие продолжат, потврдувајќи ја својата посветеност на денуклеаризацијата, објави новинската агенција Јонхап.
„Ние ќе го поддржиме дијалогот меѓу Северна Кореја и САД“, изјави претставник на претседателот.
„Владата ќе работи на намалување на тензиите и градење доверба (со Северна Кореја) со долгорочна перспектива, со цел да се надмине непријателството меѓу двете Кореи и придвижување кон мирни односи“, додаде претставникот
Владата на Ли Џе Мјунг го почитува системот на Северот (Северна Кореја) и не бара обединување преку апсорпција, посочи претставникот.
