Катарскиот емир и шефот на американската дипломатија разговараа за посредничките напори за прекин на огнот во Газа

ДОХА (АА) - Катарскиот емир Тамим бин Хамад ал Тани разговараше во Доха со американскиот државен секретар Ентони Блинкен за последните посреднички напори за постигнување примирје во Појасот Газа, пренесува Анадолу.

Катарскиот премиер Мухамед бин Абдулрахман ал Тани исто така присуствуваше на состанокот кој се одржа вчера, наведе Катарската новинска агенција.

На средбата, како што се соопштува, се разговарало за „блиските стратешки односи меѓу двете пријателски земји и начините за нивна поддршка и развој на различни полиња“.

Тие, исто така, разговараа за најистакнатите регионални и меѓународни настани од заеднички интерес, „првенствено за случувањата во Појасот Газа и окупираните палестински територии, со тековни посреднички напори за постигнување итен прекин на огнот и обезбедување проток на хуманитарна помош за Појасот Газа“.

Блинкен вчера пристигна во Катар од Јордан, последната станица од тридневната турнеја на Блискиот Исток, која вклучуваше и посети на Египет и Израел.