ИСТАНБУЛ (АА) - Минатиот петок новинарката Хинд Кудари, која во вечерните часови присуствуваше на клучната прес-конференција во болницата Ал Шифа, најголемата медицинска установа во Газа, дозна дека нејзиниот мобилен телефон нема покриеност со интернет, јавува Анадолу.
Отпрвин, таа мислела дека проблемот со интернетот имал врска со просториите на болницата, особено затоа што израелските власти само неколку часа претходно тврдеа дека распространетиот медицински комплекс се користи како база од страна на палестинската група Хамас.
Сепак, набрзо стана јасно дека има целосен прекин на комуникациите низ Појасот Газа - без телефони и интернет, сето тоа додека израелските бомби беа фрлани во темната ноќ.
Кудари, како и милиони други Палестинци во опколената енклава, била исплашена и се плашела од најлошото бидејќи биле целосно отсечени од своите најблиски.
„Бев преплашена бидејќи не знаев ништо за моето семејство. Сè што можев да слушнам беа непрекинати експлозии, а не можевме ни да знаеме каде се случува тоа“, рече Кудари, која соработува со Анадолу од почетокот на конфликтот пред повеќе од три недели.
Како што одминуваше ноќта, Газа одекнуваше од застрашувачкиот звук на постојаните експлозии. Црвените блесоци постојано се пробиваа низ темното небо, претворајќи го во морничава портокалова боја и оставајќи го воздухот со густа чад.
Кудари, активна корисничка на социјалните мрежи Х и Инстаграм, со илјадници следбеници, немаше начин да му каже на светот низ што минуваат милиони жители на Газа, нешто што таа го прави со огромна храброст и професионалност секој ден.
Кудари сепак се снајде со eСИМ-картичка, што ја добила од нејзината пријателка, египетската писателка и активистка Мирна ел Хелбави.
eСИМ-картичката им дава на корисниците опција да ги активираат мобилните податоци на мобилната мрежа без всушност да имаат физичка СИМ-картичка.
Интернет-услугите беа обновени во Газа речиси 48 часа подоцна, но сè уште се непредвидливи и несигурни.
Кудари рече дека конекцијата повремено се губи, поради што таа се потпира на нејзината eСИМ-картичка.
„eСИМ-картичките се покажаа многу важни во поврзувањето на Палестинците со светот“, рече таа.
- Иницијатива „од луѓе на луѓе“
Мирна и нејзината сестра Јара ел Хелбави беа меѓу активистите низ светот кои бараа начини да помогнат во обновувањето на комуникацијата за Палестинците во Газа.
Како и многу други, тие, исто така, првично се залагаа за барањето до милијардерот Илон Маск да ги обезбеди неговите интернет-услуги Старлинк во Газа.
Бидејќи тие повици не се послушаа и времето одминуваше, тие почнаа да бараат други опции.
Сестрите Хелбави тогаш помислиле на роаминг-услуги.
Почнаа со две eСИМ-картички купени од Европа и ги испратија на двајца луѓе што ги познавале во Газа.
„Откако потврдивме дека работи, почнавме да се јавуваме (за да провериме) дали уште некои луѓе би сакале да поврзат други луѓе преку еСИМ“, изјави Јара за Анадолу во видеоповик.
За само 24 до 48 часа, сестрите добија повеќе од 2.000 eСИМ-картички како донации, а досега можеа да обезбедат повеќе од 1.000 на луѓето во Газа.
Почетен приоритет беа новинарите и медицинскиот персонал, но сега им ги даваат на сите.
„Доколку Газа е лишена од најосновните хуманитарни потреби, најмалку што луѓето можат да имаат е начин или алатка да му кажат на светот за она што се случува со нив“, рече Јара.
Таа изјави дека ова што во моментот се случува, кое се нарекува некој вид геноцид, барем треба да има начин да се документира со објавување на содржина онлајн.
„Триесет години отсега, луѓето би сакале да знаат што се случувало. Ова е дел од историјата што ја живееме во моментов и секој има право да го документира тоа. Без телекомуникации нема да можеме да го направиме ова.“
- Луѓето се обидуваат да „создадат решенија“ за жителите на Газа
Башар Шахин, јордански маркетинг-менаџер кој живее во главниот град на Саудиска Арабија, Ријад, води слична кампања за да обезбеди eСИМ-картички за Палестинците.
„Почнав со еден човек во Појасот Газа. Порано му ги испраќав eСИМ-картичките, а тој им ги делеше на колегите и новинарите. И кругот стана поголем“, изјави тој за Анадолу во видеоинтервју.
Првата eСИМ што ја добил била донирана од тинејџерка, ја испратил во Газа и ја добил новинар.
Шахин рече дека досега примиле илјадници eСИМ-картички во донации и сега работат со четири лица за да се справат со дистрибуцијата.
Според него, главен проблем е што повеќето од eСИМ-картичките работат само на специјализирани или понови уреди како што се ајфон X и 11 или нови телефони со андроид-систем.
„Исто така, не секој знае како да ги активира eСИМ-картичките“, додаде тој.
Тој рече дека првично добивале eСИМ-картички со „неделни пакети“, но сега луѓето испраќаат повеќе со месечни пакети, „каде што секое лице добива 30 гигабајти валидни за еден месец“.
И Хелбави и Шахин тврдеа дека не прифаќаат парични донации.
Шахин рече дека луѓето кои ги добиле eСИМ-картичките сега „знаат дека имаат опција“ дури и ако интернетот е исклучен.
„Сега тие (Палестинците) знаат дека имаат луѓе надвор од Газа кои ќе направат сѐ за да им помогнат. Тие ќе ги создадат опциите. Тие ќе ги создадат решенијата за да ги решат овие проблеми“, рече тој.
