Италија: Силвио Берлускони има леукемија, започнал со хемотерапија

РИМ (АА) - Поранешниот италијански премиер Силвио Берлускони има леукемија и започнал да прима хемотерапија, пренесува Анадолу.

Според веродостојни извори на италијанската агенција АНСА, се тврди дека на 86-годишниот Берлускони, кој вчера беше хоспитализиран во миланската болница „Сан Рафаеле“ и задржан на интензивна нега, му е дијагностицирана леукемија.

Иако од болницата не е дадено никакво соопштение за состојбата на Берлускони, италијанските медиуми објавија дека тој има хематолошки проблеми (болест на крвта), што предизвика загриженост.

Наведено е дека Берлускони, кој дошол во болница поради кардиоваскуларни проблеми и респираторни тегоби, ноќта ја поминал мирно.

Неговиот брат Паоло, помладиот син Луиџи и ќерката Марина го посетиле Берлускони во болница.

Антонио Тајани, координатор на партијата на Берлускони, Форца Италија, кој воедно е и вицепремиер и министер за надворешни работи, рече дека не е лекар и дека не може да коментира за здравствената состојба на поранешниот италијански премиер.

„Проблемите со крвта се нормални за луѓе над 50-60 години. Нема потреба од паника, но секако треба да се разговара со лекарите. Разговарав со професорот Алберто Зангрило и тој рече дека неговата состојба е стабилна“, изјави Тајани.

Берлускони имаше неколку здравствени проблеми во последниве години, меѓу кои и срцев удар во 2016 година за кој неговиот лекар рече дека можело да биде фатален, како и итна операција на цревата во 2019 година.

Во 2020 година, тој се бореше со компликации поврзани со Ковид-19, за што рече дека е најлошото искуство во неговиот живот.