Ahmet Dursun
10 Јули 2022•Ажурирај: 11 Јули 2022
ТЕХЕРАН (АА) - Иран ги потврди тврдењата на Меѓународната агенција за атомска енергија дека почнал да користи центрифуги од новата генерација ИР-6 за да го забрза процесот на збогатување ураниум, пренесува Агенција Анадолија (АА).
Во разговор за државната телевизија, портпаролот на Иранската агенција за атомска енергија, Бехруз Камалванди, го оцени извештајот на Меѓународната агенција за атомска енергија објавен во некои странски медиуми.
Потврдувајќи го извештајот, Камалванди рече дека Иран уредно ја информирал Агенцијата за активностите што ги спроведува.
„Информацијата за вбризгување гас во новиот синџир центрифугални машини ИР-6 го пријавивме до Меѓународната агенција за атомска енергија пред две недели, но тоа странските медиуми го преувеличаа во согласност со некои нивни цели“, рече Камалванди.
Нагласи дека за сите активности ја информирале Меѓународната агенција.
„Дваесет отсто од збогатениот ураниум е добиен од синџирот на нови центрифугални машини инсталирани во постројката Фордо пред две недели. За ова ја известивме и Агенцијата“, истакна Камалванди.
Одлуката на Иран да започне со користење на центрифугите од новата генерација ИР-6, кои овозможуваат побрзо збогатување на ураниумот, следи откако се намалија изгледите за постигнување договор во преговорите за оживување на нуклеарниот договор.
Иран, наводно, првпат ја произвел ИР-6 во 2009 година.
Иранскиот нуклеарен договор, официјално наречен Заеднички сеопфатен план за акција (JCPOA), беше потпишан во 2015 година од Иран, САД, Кина, Русија, Франција, Велика Британија, Германија и Европската Унија.
Според договорот, Техеран се обврза дека ќе ја ограничи својата нуклеарна активност на цивилни цели, а светските сили се сложија да се откажат од економските санкции кон Иран.
САД, под водство на поранешниот претседател Доналд Трамп, еднострано се повлекоа од договорот во 2018 година и воведоа санкции кон Иран, што го наведе Техеран да престане да се придржува до договорот.
