Diyar Güldoğan
16 Декември 2025•Ажурирај: 17 Декември 2025
ИСТАНБУЛ (AA) – Шефот на Иранската организација за атомска енергија (IAEO), Мухамад Еслами, ги отфрли барањата на Меѓународната агенција за атомска енергија (МААЕ/IAEA) за инспекција на нуклеарните локации кои беа цел на напади од САД и Израел во јуни, пренесува Анадолу.
Според новинската агенција ИСНА, Еслами изјавил дека Техеран дозволил инспекции на нуклеарни објекти кои не биле погодени од нападите.
„Мора да постои протокол за инспекција на нуклеарните локации кои се нападнати, пред да се даде дозвола“, цитиран е Еслами.
Тој ја критикуваше МААЕ поради тоа што не ги осудила нападите врз иранските нуклеарни постројки.
„Агенција која не издава осуда и нема инструкции, нема право да тврди дека има намера да врши инспекција“, рече тој.
Иран во повеќе наврати ја обвини МААЕ дека не ги осудува нападите врз неговите клучни нуклеарни објекти и ја обвини агенцијата дека на Израел му пренесувала чувствителни информации поврзани со тие локации.
Еслами додаде дека притисокот од три европски земји, САД и Израел „не ни е важен и нема никакво влијание“.
Тој истакна дека генералниот директор на МААЕ, Рафаел Гроси, треба да сноси одговорност, потсетувајќи дека иранските нуклеарни објекти биле под надзор на агенцијата пред нападите.
„Агенцијата е таа што мора да биде одговорна и да одговара пред светот“, нагласи тој, додавајќи дека нападите врз нуклеарните постројки може да се случат во која било земја и дека агенцијата мора да објасни какви процедури има воспоставено за такви настани.
Тензиите меѓу Техеран и Вашингтон значително се зголемија по војната во јуни, а нуклеарните преговори се ставени во втор план. Иран инсистира дека разговорите можат да продолжат само доколку САД гарантираат дека процесот нема повторно да биде саботиран.
Вашингтон, пак, бара Техеран да влезе во директни преговори за својата нуклеарна програма, истовремено тврдејќи дека иранската нуклеарна инфраструктура претрпела непоправлива штета во американските напади врз три клучни нуклеарни локации во Иран за време на 12-дневната војна.
