Betül Yılmaz
16 Декември 2025•Ажурирај: 17 Декември 2025
ГАЗА/ИСТАНБУЛ (АА) - Илјадници шатори во кои се сместени раселените Палестинци во Појасот Газа беа поплавени, заедно со болница, по обилните дождови предизвикани од новиот временски систем со низок притисок рано утринава, јавува Анадолу.
Според дописникот на Анадолу, водата поплавила делови од болницата Ал-Шифа во градот Газа, особено рецепцијата и одделот за итни случаи, што предизвика прекин на работата.
Болницата Ал-Шифа, најголемиот медицински комплекс во Појасот Газа, беше изложена на бројни израелски напади во текот на две години геноцид и претрпе сериозни штети. Напорите за рехабилитација на Министерството за здравство на Газа по прекинот на огнот не успеаја поради спречувањето од страна на Израел да биде внесена потребната опрема.
Очевидци за Анадолу изјавија дека илјадници шатори за раселените лица биле поплавени и однесени од силните ветрови што го погодуваат Појасот Газа од синоќа.
„Се разбудивме со звукот на силен ветер што удираше во нашиот шатор. Се обидовме да го обезбедиме и задржиме, но ветровите го откорнаа шаторот и сите наши работи одлетаа“, изјави Палестинецот Халед Абдел Азиз за Анадолу.
„Надвор сум со сопругата и децата, седам на дождот. Нема каде да се засолнам“, рече Абдел Азиз.
Стотици Палестинци се обиделе да се засолнат од дождовната вода во деловите од зградите уништени од израелската Армија во градот Газа, според очевидци.
Портпаролот на Цивилната одбрана во Газа, Махмуд Басал, предупреди дека илјадници домови делумно уништени за време на израелскиот геноцид се изложени на ризик од уривање во секој момент поради дождот и силните ветрови.
„Овие домови претставуваат сериозна опасност за животите на стотици илјади Палестинци кои не нашле засолниште“, изјави Басал за Анадолу.
„Го предупредувавме светот постојано, но без успех.“
Најмалку 14 лица ги загубија животите во зимска бура во Газа минатата недела. Над 27.000 шатори за раселените лица беа поплавени, однесени од порои или искинати од силните ветрови, а 13 згради се урнаа низ Газа.
Речиси 250.000 семејства моментално живеат во кампови за раселување низ Појасот Газа, од кои многумина се соочуваат со студено време и поплави во кревки шатори, според Цивилната одбрана.
Иако прекинот на огнот стапи на сила на 10 октомври, условите за живот во Газа не се подобрија, бидејќи Израел продолжува да воведува строги ограничувања за влезот на камиони со помош, кршејќи го хуманитарниот протокол на договорот.
Израел уби повеќе од 70.600 Палестинци, претежно жени и деца, а повредени се над 171.100 во нападите во Газа од октомври 2023 година, кои продолжија и покрај прекинот на огнот.
