Иран ги негира обвинувањата дека стои зад несреќата со украинскиот авион

ТЕХЕРАН

Иран денеска негира каква било одговорност за соборувањето на украинскиот авион кој се урна вчера во Техеран, нарекувајќи го обвинението лажно и дека претставува психолошка операција на САД, пренесува Агенција Анадолија (АА).

Портпаролот на Владата, Али Рабиеи, соопшти дека Комитетот задолжен за истрага на инцидентот е формиран врз основа на регулациите на Меѓународната организација за цивилно воздухопловство (ICAO).

Рабиеи изјави дека Комитетот ќе го истражи инцидентот итно и транспарентно со учество на експерти од релевантни земји.

Тој нагласи дека украински претставник веќе се наоѓа во Иран за да ја истражи црната кутија од авионот.

„Исто така добредојдено е и присуството на релевантните земји во истрагата, чии државјани загинаа во инцидентот“, додаде тој.

Рабиеи изјави дека обвинувањата дека авионот бил соборен од страна на ирански проектил е пресметан чекор и психолошка операција.

Тој изјави дека снимката која била објавена е лажна и дека никој нема да земе одговорност за тоа. Тој, исто така ги повика САД да учествуваат во Комитетот за истражување, наместо да лажат и да учествуваат во психолошки операции.

„Во меѓувреме, портпаролот на иранското Министерство за надворешни работи, Абас Мусави, изјави дека Иран ги повикал и Украина и компанијата „Боинг“ да учествуваат во истрагите“, се вели во соопштението кое го пренесе државната новинска агенција ИРНА.

Портпаролот на Министерството изјави дека исто така се добредојдени и експерти од другите земји чии државјани загинаа во несреќата.

Авионот „боинг 737“ на украинската авиокомпанија „Украина ерлајнс“, кој требаше да лета кон Киев, падна на 8 јануари кусо по полетувањето од аеродромот „Имам Хомеини“ во Техеран. Ниту еден од 176-те патници и членови на посадата не преживеа.

Иранските официјални претставници претходно соопштија дека се верува оти авионот паднал од технички причини, а и украинските официјални претставници го сметаа тоа во првата фаза. Меѓутоа, подоцна се пронајдени црните кутии и е изјавено дека сѐ уште не е позната причината за падот на леталото.

Еден од американските официјални претставници изјави дека сметаат оти е можно падот на авионот да се случил поради еден од проектилите кои ги истрелал Иран.

Меѓу загинатите патници се наоѓаат државјани од Иран, Канада, Украина, Шведска, Авганистан, Германија и Велика Британија.