САД: Претставничкиот дом ја усвои Резолуцијата за ограничување на воените акции на Трамп против Иран

ЊУЈОРК

Претставничкиот дом на американскиот Конгрес во кој демократите имаат мнозинство, ја усвои Резолуцијата според која се ограничуваат овластувањата на американскиот претседател Доналд Трамп во преземање воени акции против Иран, јавува Агенција Анадолија (АА).

Резолуцијата за која гласаа сите пратеници на Демократската партија, тројца републиканци и независен претставник, не е од обврзувачки карактер, а донесена е помалку од една недела откако Трамп нареди напад со беспилотни летала во Ирак, во кој е убиен Касим Сулејмани. Ова предизвика заострување на тензиите меѓу САД и Иран, какво што не е видено уште од Исламската револуција во 1979 година.

Според зборовите на Џери Надлер, демократ од Њујорк, кој претседава со Правосудната комисија на Претставничкиот дом, убиството во близина на аеродромот на главниот ирачки град Багдад го направило светот поопасен со мешање во ситуација во веќе многу турбулентен регион.

Републиканците, од друга страна, тврдеа дека е потребно да се решава прашањето за Иран и дека Трамп имал овластувања тоа да го направи според Воениот закон од 2002 година, кој го одобри Конгресот по нападите на 11 септември во 2001 година.

„Резолуцијата за воени овластувања која демократите ја изгласаа има сила еднаква на Резолуцијата за Новата година. Каква непријатност“, напиша на Твитер републиканскиот претставник Кевин Мекарти.

Горниот дом на американскиот Конгрес, Сенатот, би можел да разгледа слична мерка, со што воените овластувања на Трамп би биле поефективно ограничени, но се смета дека таков документ нема да привлече големо внимание во Домот во кој републиканците се мнозинство.