Интензивните дипломатски напори на турскиот претседател на Самитот на НАТО

МАДРИД (АА) - Турскиот претседател Реџеп Таип Ердоган на маргините на Самитот на НАТО во Мадрид оствари билатерални средби со лидерите на САД, Германија, Франција, Англија, Шпанија, Холандија, Австрија и ЕУ, јавува Агенција Анадолија (АА).

На 28 јуни, Ердоган присуствуваше на четиринасочна средба заедно со финскиот претседател Саули Нинисто, шведската премиерка Магдалена Андерсон и генералниот секретар на НАТО, Јенс Столтенберг, во врска со кандидатурите на нордиските земји да се приклучат на воената алијанса од 30 членки.

На средбата, која траеше околу три часа, Ердоган зборуваше за борбата на Турција против терористичките организации. За време на состанокот, лидерите на Шведска и Финска се обврзаа да преземат чекори за решавање на загриженоста на Туркије. По средбата страните потпишаа меморандум.

Учествувајќи во фотосесијата на првиот ден од Самитот, Ердоган присуствуваше на сесија за Украина.

Пред сесијата, Ердоган имаше краток разговор со американскиот претседател Џо Бајден, германскиот канцелар Олаф Шолц, британскиот премиер Борис Џонсон, канадскиот премиер Џастин Трудо, албанскиот премиер Еди Рама и генералниот секретар на НАТО, Јенс Столтенберг.

Подоцна, Ердоган се состана со неговиот француски колега Емануел Макрон во Конгресниот центар ИФЕМА. Тој се состана и со британскиот премиер Џонсон и со претседателот на Европскиот совет, Шарл Мишел.

- Средба на турскиот претседател со американскиот колега


На маргините на Самитот, Ердоган се сретна и со неговиот американски колега Џо Бајден, а средбата траеше речиси еден час.

На средбата Ердоган рече дека чекорите што се преземаат за зајакнување на НАТО ќе имаат „посебен придонес“ во контекст на руско-украинската криза.

Турскиот претседател присуствуваше и на неформалната трансатлантска вечера, организирана од шпанскиот премиер Педро Санчез во чест на шефовите на држави и влади и првите дами.

Тој на маргините на Самитот оствари билатерална средба со австрискиот канцелар Карл Нехамер.

Вториот ден Ердоган се сретна со шпанскиот премиер Педро Санчез. По средбата присуствуваше на сесијата за тероризам, на која беше прикажано видео за борбата на Турција против тероризмот.

По сесијата, турскиот претседател се сретна со германскиот канцелар Олаф Шолц и холандскиот премиер Марк Рут. Ердоган својата последна билатерална средба ја одржа со романскиот претседател Клаус Вернер Јоханис.