Илјадници лица во САД аплицираат до Амбасадата на Украина за да се приклучат во борбата против Русија

ВАШИНГТОН (АА) ‒ Илјадници луѓе се обратија до Украинската амбасада во Вашингтон за да се приклучат во борбата против Русија заедно со Украинската армија, јавува Агенција Анадолија (АА).

Воен претставник во Амбасадата за АА изјави дека добиле повеќе од 3.000 мејлови од оние кои сакале да одат во Украина.

„Ние им одговоривме и ги замоливме да пополнат формулар за апликација. Потоа ќе ги провериме сите апликации и ќе провериме кој може да оди. Сега сме во процес“, рече функционерот, кој побара да остане анонимен.

Според официјалниот претставник, помалку од половина од оние кои испратиле електронска пошта, ги пополниле своите апликации.

Меѓу апликантите имало поранешни воени службеници и цивили кои сакаат да му помогнат на украинскиот народ во хуманитарните активности.

Официјалниот претставник, исто така, ја пофали меѓународната поддршка за Украина, вклучително и онаа на Турција, која функционерот ја нарече „инспиративна“.

„Добиваме и материјална и морална поддршка“, рече функционерот.

„Конкретно, турската поддршка е од висока вредност за нас.“

„Ние сме посветени да ја браниме нашата земја“, додаде функционерот.

Украинскиот претседател Владимир Зеленски во средата изјави дека 16.000 странски војници се на пат кон Украина за да се приклучат во војната против руските сили. Вчера, првата група борци пристигнале во Украина за да ја бранат земјата од Русија, според Зеленски.

Војната на Русија против Украина, која започна на 24 февруари, наиде на меѓународен гнев, при што Европската Унија, Соединетите Американски Држави и Велика Британија, меѓу другите, спроведуваат строги финансиски санкции кон Москва.

Според податоците на ОН, од почетокот на војната во Украина се убиени 227 цивили, а 525 се повредени. Меѓутоа, украинските власти соопштија дека бројот на загинати е над 2.000.

Според Агенцијата за бегалци на ОН, повеќе од 1 милион луѓе ја напуштиле Украина и преминале во соседните земји.