Кремљ: „Западните санкции заради казнување на Русија се залудни“

МОСКВА (АА) – Портпаролот на Кремљ, Дмитриј Песков, денес изјави дека напорите за „казнување“ на Русија се залудни, јасно мислејќи на санкциите што западните земји ги воведоа за Москва, пренесува Агенција Анадолија (АА).

„Европските земји кои ја поддржуваат Украина порано или подоцна ќе почнат да се прашуваат дали претседателот Владимир Зеленски ги прави работите правилно“, изјави Песков, објави руската државна новинска агенција „ТАСС“.

Песков изјави дека европските земји кои вовеле низа санкции кон Москва откако Русија започнала војна против Украина на 24 февруари и нивните граѓани „сами ја плаќаат цената“.

„Порано или подоцна и овие земји ќе почнат да се прашуваат: Дали Зеленски прави сѐ како што треба, зошто нашите граѓани треба да плаќаат за неговите каприци? Значи, украинската страна треба да биде свесна за тоа“, изјави Песков како одговор на интервјуто на Зеленски за „Вашингтон пост“ во кое ги повика западните земји да забранат влез на сите руски граѓани.

Европската Унија воведе шест пакет-санкции против Русија од почетокот на војната на 24 февруари.

Пакет-санкциите на ЕУ се насочени, меѓу другото, кон рускиот претседател Владимир Путин и министерот за надворешни работи Сергеј Лавров и го забрануваат увозот на злато, нафта и јаглен и извозот на луксузна стока, и ги исклучуваат руските и белоруските банки од користење на меѓународниот платен систем СВИФТ.