Израелски медиуми: Израелската влада размислува да издаде наредба на армијата да го окупира градот Газа

КУДС (ЕРУСАЛИМ) (АА) - Израелската влада размислува да и даде наредба на армијата да го окупира градот Газа, објавија денес израелските медиуми, пренесува Анадолу.

Израелскиот Канал 14 истакна дека потегот доаѓа во време на застој во индиректните преговори за постигнување на договор за прекин на огнот во Газа и размена на затвореници со Палестинците.

Според медиумот, владата на премиерот Бенјамин Нетанјаху е „задоволна“ од резултатите од нејзината воена кампања во северниот дел на Газа.

Израел ја продолжи големата копнена офанзива во северниот дел на Газа која ја започна на 5 октомври, под изговор да го спречи прегрупирањето на палестинската група на отпорот Хамас. Но, Палестинците го обвинуваат Израел дека има за цел да ја окупира областа и присилно да ги исели нејзините жители.

„Политичкиот ешалон размислува да издаде наредба до израелската армија да се упати кон југ и да го окупира градот Газа во блиска иднина“, објави каналот.

„Таква операција е можна сега, особено во светло на прекинот на огнот во Либан и достапноста на поголем број армиски сили за извршување на големи и пролонгирани маневри.“

Активностите за посредување предводени од САД, Египет и Катар за постигнување прекин на огнот во Газа досега беа неуспешни поради одбивањето на Нетанјаху да ја запре војната.

Израелската армија ја продолжи геноцидната војна врз Газа во која досега се убиени над 45.500 Палестинци, главно жени и деца, од нападот на Хамас на 7 октомври 2023 година, и покрај резолуцијата на Советот за безбедност на ОН со која се бара итен прекин на огнот.

Во ноември, Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.