Rania R.a. Abushamala
13 Ноември 2024•Ажурирај: 14 Ноември 2024
ИСТАНБУЛ (АА) - Израелски заложник денес рече дека нападите на израелската армија врз Газа ги загрозуваат животите на заробениците и повика на протести во Израел за да се изврши притисок за постигнување договор за размена на заробеници со Палестинците, јавува Анадолу.
Видеоснимка од заложникот Александар Турбанов (28) објави палестинската група Исламски џихад на својот канал на Телеграм.
„Повеќе од една година сум заробеник на борците на движењето Исламски џихад - година на недостиг на храна, вода и струја. Сега немаме сапун и шампон, поради што ми се појавија проблеми со кожата“, рече Турбанов во видеото.
Обраќајќи им се на Израелците, тој истакна: „Кога нешто јадете или пиете, сетете се на нас, заложниците, кои немавме иста шанса да уживаме во храната и пиењето како вас.“
„Сакам да ве потсетам дека кога го затворивте преминот (Рафа) за да извршите притисок врз Палестинците во Газа, вие исто така извршивте притисок врз нас.“
Израелско-рускиот државјанин рече: „Цела година во заробеништво... цела година мојот живот е постојано загрозен поради воените операции што наводно се насочени кон наше ослободување.“
„Борците на Исламски џихад неколкупати ми го спасуваа животот за да ја спречат мојата смрт. Некои од нив беа повредени, а други беа убиени обидувајќи се да ме одржат жив.“
Заложникот предупреди дека тековното израелско бомбардирање на Газа го става во опасност животот на израелските заробеници.
„Сакам да ви кажам дека мојот живот е секојдневно во ризик... Воените операции што Нетанјаху ги избра за да обезбеди наше ослободување на крајот ќе доведат до моја смрт“, нагласи тој.
„Почнав да се плашам од армијата. Се плашам од моментот кога војската ќе стигне до мене или од моментот кога ќе го бомбардираат местото каде што ме држат.“
Турбанов рече дека многумина заложници се убиени во израелските воздушни напади врз Газа.
„Само многу мал број се ослободени. Единственото добро што го направија за затворениците беше првиот прекин на огнот во ноември минатата година“, рече израелскиот заложник.
„Ве замолувам (Израелци) да излезете, да ги блокирате улиците некое време и да започнете сеопфатни протести. Запомнете нѐ и не нѐ заборавајте“, порача заложникот.
Израел продолжува со бруталната офанзива врз Газа во која од 7 октомври минатата година се убиени повеќе од 43.700 Палестинци, главно жени и деца, а повредени се над 103.200.
Израел смета дека над 100 заложници сè уште се држат од палестинските фракции во Газа.
Со напорите за посредување предводени од САД, Египет и Катар досега не се успеа да се постигне договор за прекин на огнот во Газа и размена на заложници, но Вашингтон тврди дека израелскиот атентат на лидерот на Хамас, Јахја Синвар, на 18 октомври може да доведе до напредок во преговорите.
Хамас, пак, вели дека конфликтот ќе заврши само кога Израел ќе ја прекине својата воена кампања во блокираната енклава.
Поради израелската офанзива е раселено речиси целото население на територијата, а тековната блокада доведе до сериозен недостиг на храна, чиста вода и лекови.
Израел се соочува со случај за геноцид пред Меѓународниот суд на правдата за неговите дејства во Газа.
