Израелски војници застрелаа Палестинец на Западниот Брег

ЕРУСАЛИМ (АА) - Палестинец, кој беше ранет со вистински куршуми од израелски војници во областа Ал Бире која се наоѓа во централниот дел на окупираниот Западен Брег, почина во болницата каде што беше пренесен, јавува Агенција Анадолија (АА).

Претставник од Палестинскиот медицински комплекс во Рамала, кој е поврзан со Владата, во изјавата за AA рече дека во здравствениот комплекс бил донесен млад Палестинец кој бил ранет со вистински куршуми од израелски војници.

Според претставникот, и покрај сите напори на медицинските лица, младиот Палестинец не можел да се спаси.

Очевидци истакнаа дека дошло до инциденти меѓу израелските војници, кои извршиле рација во голем број куќи и десетици Палестинци во населбата Ум еш-Шераит во областа Ал Бире, во близина на Рамала.

Очевидци нагласија дека израелските војници користеле боева муниција и гумени куршуми, како и гранати со солзавец.

Израелските сили, кои често вршат рации во палестинските домови на окупираниот Западен Брег и Источен Ерусалим, приведуваат Палестинци под различни обвинувања.

Според извештаите на Обединетите нации, израелските сили извршиле рации на палестински територии приближно 1.600 пати од почетокот на 2022 година до 26 јуни.

За време на овие рации, 60 Палестинци ги загубија животите, а речиси 6.000 Палестинци се повредени.