Израелската војска ќе ги истражи деталите за нападот во Газа во кој беше убиен вработен на француското МНР

АНКАРА (АА) - Израелската Армија соопшти дека ќе ги „истражи“ деталите за нападот во Појасот Газа, каде што беше убиен функционер на Министерството за надворешни работи (МНР) на Франција, но дека од француските власти не добиле некои информации, јавува Анадолу.

Канцеларијата на портпаролот на израелската Армија одговори на писменото прашање на Анадолу во врска со припадникот на француското Министерство за надворешни работи, кој го загуби животот како последица на израелскиот напад на Појасот Газа.

Потврдувајќи дека припадник на француското МНР бил убиен за време на нападите во регионот Рафа, израелската војска тврди дека нападите биле извршени „во согласност со меѓународното право“.

„Војската не добила доволно детали за да го истражи инцидентот во овој момент. Министерството за надворешни работи побара детални информации од француските власти во врска со идентитетот на овој член на персоналот. Откако ќе се добијат дополнителни детали, Армијата ќе ги разгледа деталите за инцидентот“, се вели во писмениот одговор на израелската војска.

- Француското МНР соопшти дека еден нејзин член е убиен во израелски напад

Во соопштението на Министерството за надворешни работи на Франција се вели дека на 13 декември припадник на Министерството бил тешко повреден и многу луѓе ги загубиле животите како последица на израелскиот напад врз резиденција во градот Рафа на југ на Појасот Газа.

Тешко ранетиот член на Министерството подоцна почина, а Франција го осуди нападот врз цивилната резиденција.

Франција побара од израелските власти што поскоро да дадат појаснување во врска со условите во кои е извршено бомбардирањето.

- Францускиот министер не го спомена ова прашање на прес-конференцијата во Израел

Шефицата на француската дипломатија Катрин Колона на прес-конференцијата со израелскиот колега не ја спомена состојбата на припадникот на француското МНР, кој беше застрелан од израелската Армија во цивилната резиденција на границата помеѓу Газа и Египет.

Таа рече дека дошла во Тел Авив за да повтори дека нејзината земја го поддржува „правото на Израел на самоодбрана во рамките на меѓународното право“.

Нагласувајќи ја поддршката за Израел, Колона изјави дека е важно да се направи хуманитарна пауза во конфликтот и дека тоа треба да се претвори во „итен и траен“ прекин на огнот.

– Израелското Министерство за надворешни работи побара информации од Франција

Новинарот на Анадолу ги прашал израелските власти за членот на француското МНР, кој го загуби животот како резултат на израелскиот напад на Газа, и за осудата од париската администрација за овој инцидент.

На прашањата на Анадолу, „Дали Израел даде објаснување до француските власти за ова прашање? Дали сте во контакт со француските власти? Дали израелската војска знаеше дека припадник на француското МНР се наоѓаше таму?“, портпаролот на израелското Министерство за надворешни работи, Лиор Хајат, одговори: „Ова прашање беше разговарано меѓу Израел и Франција. Побаравме повеќе информации за времето и местото на бомбардирањето со цел да спроведеме истрага“.

- Француското МНР сѐ уште нема одговорено на прашањето на Анадолу во врска со оваа тема

Репортерот на Анадолу се обрати до француското Министерство за надворешни работи на 17 декември, но тоа сѐ уште не одговори на прашањето дали администрацијата во Париз ќе бара компензација и извинување за убиството на членот на Министерството за надворешни работи на Франција во Газа како резултат на израелскиот напад.

- Француските пратеници реагираа против Израел

Пратеничката на партијата Ренесанса и потпретседателка на собраниската Комисија за надворешни работи, Мирел Клапо, реагираше за убиството на персоналот во Министерството.

„Убиени се 18 илјади луѓе, од кои две третини се жени и деца, 3 израелски заложници и вработен во француското МНР. Што ќе му биде потребно на светот да престане да го поддржува Израел во неговото убиствено лудило?“, рече Клапо во својата објава на платформата X.

Пратеникот на партијата „Непокорна Франција“ (ЛФИ), Антоан Ломан, во својата порака вели дека се солидаризираат со семејството на членот на Министерството, кој го загуби животот во израелските напади. „Време е да ги ставиме нашите тупаници на маса против (Бенјамин) Нетанјаху“, рече тој.