Muhammed Sabry
15 Ноември 2023•Ажурирај: 16 Ноември 2023
ГАЗА (АА) – Израелската војска со експлозив ги разнесе подрумите на неколку објекти во рамките на болничкиот комплекс Ал-Шифа откако израелските сили денес упаднаа во болницата, соопштија медицински извори, јавува Анадолу.
„Израелската војска е единствена страна што пука во болницата Ал-Шифа и нејзината околина“, изјавија извори од болницата.
„Израелската војска држи десетици раселени луѓе и медицински персонал во дворот зад болницата и ги испрашува“, истакна изворот, објаснувајќи ја моментната ситуација во главната здравствена установа во Газа, која речиси и не може да функционира поради интензивното бомбардирање од израелските сили.
Медицинските извори нагласија дека израелската војска им ги врзала очите и привела голем број луѓе од болницата откако ги соблекла голи и ги однела на непозната локација.
„Комуникациите со оние во болницата Ал-Шифа беа целосно прекинати“, јави репортерот на Анадолу.
Според извештаите, „израелската војска детално ги пребарува објектите во кои изврши упад“.
„Снајперистите на израелската војска зазедоа позиции на покривите на неколку високи згради во болницата, создавајќи дупки во нив“, изјавија истите извори.
Според владината Канцеларија за медиуми во Газа, во болничкиот комплекс има околу 1.500 медицински лица, 700 пациенти, 39 предвреме родени бебиња и 7.000 раселени лица.
Израелските напади врз Појасот Газа влегоа во четириесеттиот ден, а според најновите податоци на палестинските власти загинати се најмалку 11.320 Палестинци, вклучително повеќе од 7.800 жени и деца, а над 29.200 се повредени.
Илјадници згради, меѓу кои и болници, џамии и цркви, исто така, се оштетени или уништени во немилосрдните воздушни и копнени напади на Израел врз опколената енклава што почнаа минатиот месец.
Според официјални податоци, бројот на загинати во Израел изнесува околу 1.200.
