Израелската војска побара евакуација на болницата Ал-Кудс во Газа

КУДС/ЕРУСАЛИМ (АА) - Израелската војска ѝ даде рок на палестинската Црвена полумесечина да ја евакуира болницата Ал Кудс во блокираниот Појас Газа денеска до 16 часот по локално време, јавува Анадолу.

Во соопштението на палестинската Црвена полумесечина се наведува дека израелската војска прво предупредила дека болницата Ал Кудс во Газа треба да биде евакуирана до 6 часот наутро, а потоа испратила нова порака, давајќи рок до 16 часот по локално време.

Палестинската Црвена полумесечина нагласи дека повеќе пациенти се на интензивна нега во таа болница.

„Бебињата се во инкубатори, а стотици цивили се засолнети таму. Евакуацијата не е можна“, се наведува во соопштението на палестинската Црвена полумесечина.

Се додава дека десетици илјади Палестинци одбиваат да ги напуштат своите домови во северниот дел на Газа поради израелските напади.

Црвената полумесечина на Палестина ги повика светските лидери, меѓународната заедница и Обединетите нации (ОН) да ја запрат одлуката на Израел за евакуирање на болницата и да интервенираат за да се осигура безбедноста на таа установа.