Израелската армија уништи цели населби во Тулкарем за време на нападите на Западниот Брег

ТУЛКАРЕМ/ ИСТАНБУЛ (АА) – Израелската армија урна цели населби во градот Тулкарем за време на смртоносната воена офанзива во северниот дел на Западниот Брег, изјави денес палестински официјален претставник, јавува Анадолу.

„Израелската армија работи на уништување на сите средства за опстанок, уништувајќи улици, инфраструктура и уривајќи цели станбени блокови“, изјави за Анадолу заменик-гувернерот на Тулкарем, Фајсал Салама.

Опишувајќи ја ситуацијата во градот како „катастрофална“, тој нагласи дека цели станбени блокови биле урнати во бегалските кампови Тулкарем и Нур Шамс.

Салама додаде дека израелската армија наредила 12 палестински семејства во кампот Тулкарем да ја напуштат областа.

„Армијата го принуди мнозинството Палестинци од двата кампа да се преселат во други делови од градот или во соседни градови“, додаде тој.

Израелската армија продолжува со смртоносната офанзива во северниот дел на Западниот Брег од 21 јануари, при што досега се убиени најмалку 70 лица, а илјадници се раселени.

Нападите се случуваат во исто време со обновените воздушни напади врз Газа, при што се убиени најмалку 436 лица, повеќе од 670 се повредени, а беше прекршен договорот за прекин на огнот што стапи на сила во јануари.

Тензиите на окупираниот Западен Брег остануваат високи, каде што, според палестинското Министерство за здравство, биле убиени најмалку 937 Палестинци, а речиси 7.000 повредени од израелската армија и нелегалните доселеници од почетокот на нападите врз Газа на 7 октомври 2023 година.

Во јули Меѓународниот суд на правдата го прогласи долгогодишното израелско окупирање на палестинските територии за нелегално, барајќи евакуација на сите населби на Западниот Брег и во Источен Ерусалим.