Израелската армија уби уште двајца Палестинци на окупираниот Западен Брег при воена операција во Џенин

ЏЕНИН (АА) - Израелските сили убија уште двајца Палестинци денес на окупираниот Западен Брег за време на воена операција во градот Џенин, соопшти Министерството за здравство, јавува Анадолу.

Двајца млади мажи, на возраст од 25 и 30 години, се убиени во оган на израелската армија во градот Буркин, западно од Џенин, се вели во соопштението на Министерството.

Телата на двајцата мажи сè уште ги држи израелската армија, се додава во соопштението.

Синоќа израелски булдожери демолираа куќа во градот Буркин по размена на оган со вооружени Палестинци.

Израелската армија во вторникот започна воена операција во бегалскиот камп Џенин поради зголемените тензии на окупираниот Западен Брег.

Според локалните здравствени власти, во нападот се убиени најмалку 12 Палестинци, а 40 други се повредени.

Израелската армија соопшти дека операцијата во Џенин, со кодно име „Железниот ѕид“, се очекува да трае неколку дена.

Тензиите се зголемени низ окупираниот Западен Брег поради израелската геноцидна војна на Појасот Газа, во која се убиени над 47.000 Палестинци, главно жени и деца, а повеќе од 110.700 се повредени од 7 октомври 2023 година.

Според палестинското Министерство за здравство, оттогаш се убиени најмалку 873 Палестинци, а над 6.700 се повредени од оган на израелската армија на окупираната територија.

Договорот за прекин на огнот и размена на затвореници стапи на сила во Газа на 19 јануари, со што беше прекината израелската војна на палестинската енклава.

Меѓународниот суд на правдата во јули ја прогласи повеќедецениската окупација на Палестина од страна на Израел за нелегална и побара евакуација на сите населби на Западниот Брег и Источен Ерусалим.