ЕРУСАЛИМ / ИСТАНБУЛ (AA) – Израелската армија соопшти дека ова утро пресретнала два дрона во регионот Горна Галилеја, во северниот дел од земјата, известува Анадолу.

Во соопштението на израелската армија се наведува дека по активирањето на сирените во областа Горна Галилеја, две беспилотни летала истрелани кон Израел биле пресретнати од страна на воздухопловните сили.

Поради опасноста од паѓање на остатоци биле активирани сирените за ракети и проектили.

Армијата објави дека сирени биле активирани претходно и во Горна Галилеја и во близина на Киријат Шмона, во близина на границата на Израел со Либан.

Армијата исто така објави дека нејзините воздухопловни сили пресретнале повеќе дронови истрелани кон израелска територија, по сирените активирани во областа Јудеја и Мртвото Море во окупираниот југоисточен дел на Западниот Брег.

Полуофицијалната иранска новинска агенција Тасним објави: „Самоубиствени дронови од типот Араш успешно ги погодија и целосно ги уништија зададените цели длабоко во Израел“.

Во раните утрински часови во петокот, израелските сили извршија напади врз Иран, таргетирајќи нуклеарни и ракетни објекти и убивајќи над 104 лица, вклучително и врвни воени команданти и научници, при што беа повредени речиси 380 луѓе.