Qais Omar Darwesh Omar,Halime Afra Aksoy
28 Јануари 2025•Ажурирај: 29 Јануари 2025
РАМАЛА (АА)
Израелската армија веќе осми ден ги проширува и продолжува со нападите врз северниот дел на окупираниот Западен Брег, известува Анадолу.
Според информациите добиени од очевидци, израелската армија извршила рација во градот Тулкерим и во бегалските кампови во Тулкерим и Нур Шамс.
Фајсал Селаме, претседател на Народниот комитет на бегалскиот камп Тулкерим, за АА изјави:
„Десетици семејства беа насилно отстранети од нивните домови, а одземените домови се претворени во воени касарни.“
- Палестинците се користат како „жив штит“
Селаме изјави дека израелските војници ги користат Палестинците како жив штит.
Тој истакна дека израелската армија почнала да ја урива инфраструктурата на кампот.
Израелската армија, која од 21 јануари спроведува жестоки напади врз градот Џенин на Западниот брег и врз бегалскиот камп Џенин, вчера нападите ги насочи кон Тулкерим.
Во соопштението на армијата се наведува дека голем број израелски војници учествувале во нападите врз градот Тулкерим и кампот.
Двајца Палестинци се убиени, а тројца се повредени во напад на израелско беспилотно летало врз возило во Тулкерим.
- Продолжуваат нападите во Џенин
Израелската армија продолжува со нападите врз градот Џенин, на северниот дел на Западниот Брег, кои започнаа на 21 јануари.
Во нападите, во кои цел беа и имотите на Палестинците, досега животот го загубија 16 Палестинци, меѓу кои едно дете, а 50 лица се повредени.
По израелските напади врз Џенин на окупираниот Западен Брег палестинското Претседателство ја повика американската администрација да го запре „започнувањето на втора фаза од војната“ со нападите насочени кон градот Тулкерим.
Според официјалната палестинска новинска агенција ВАФА, палестинското Претседателство објави писмено соопштение во кое се вели:
„Ја повикуваме новата американска администрација да ги запре израелските интервенции со кои продолжува состојбата на нестабилност и вознемиреност во регионот и се влошуваат безбедноста и постигнувањето одржлив мир што ќе ги спречи идните конфликти.“
По стапувањето на сила на прекинот на огнот во Газа на 19 јануари, израелската армија на 21 јануари го започна нападот што го нарече „Железен ѕид“ врз градот Џенин во северниот дел на окупираниот Западен Брег.
Во нападите врз градот Џенин и бегалскиот камп израелската армија ги оштетува транспортната, водоводната, електричната и комуникациската инфраструктура, а ги уништува и домовите во подрачјето.
