Израелската армија издаде наредба за евакуација на жителите од јужните предградија на Бејрут

АНКАРА (АА) - Израелската армија денес издаде наредба за евакуација на жителите од одредени населби во јужните предградија на Бејрут, а Израел продолжува со воздушните и копнените напади врз земјата, јавува Анадолу.

Портпаролот на израелската армија Авичај Адраи во соопштението тврди дека жителите „се наоѓаат во близина на објекти и интереси што му припаѓаат на Хезболах, против кои израелската армија ќе дејствува во блиска иднина“.

Наредбите се упатени до населбите Харет Хреик и Тахуитат ал Гадир, кои се дом на илјадници либански цивили.

„Мора веднаш да се евакуирате од овие згради и соседните објекти и да се дистанцирате на најмалку 500 метри“, додаде портпаролот.

Израел започна масовна воздушна кампања во Либан од минатиот месец против, како што тврди, локации на Хезболах, што претставува ескалација од едногодишната прекугранична војна меѓу Израел и групата од почетокот на бруталната израелска офанзива врз Газа.

Според либанските здравствени власти, убиени се повеќе од 2.800 луѓе, а речиси 13.000 се повредени во израелските напади од октомври минатата година.

Израел го прошири конфликтот на 1 октомври оваа година со упад во Јужен Либан.