Ahmed Asmar
16 Април 2024•Ажурирај: 21 Април 2024
ГАЗА (АА) - Израелската Армија денес изврши ненадеен упад во делови од северниот дел на Појасот Газа, принудувајќи ги Палестинците да бегаат, јавува Анадолу.
Очевидци за Анадолу изјавија дека израелската Армија извршила ненадеен упад во областите во источна Џабалија и Беит Ханун и во северниот дел на градот Беит Лахија, среде тешко артилериско гранатирање и пукање.
Израелските сили ги опколија училиштата во кои беа засолнети раселените Палестинци во Беит Ханун и ги приведоа сите мажи внатре откако ги принудија да се соблечат во долна облека.
На жените и децата им било наредено да ги напуштат засолништата, додаваат очевидците.
Тие, исто така, рекоа дека израелската Армија се обидува повторно да го испразни Беит Ханун, откако Палестинците се вратија во пограничниот град по повлекувањето на израелската Армија.
Во меѓувреме, локални извори за Анадолу изјавија дека израелските воени авиони извршиле серија воздушни напади врз градот Деир ал Балах и бегалскиот камп Нусејрат во централниот дел на Појасот Газа, оставајќи жртви меѓу Палестинците.
Во јужниот дел на Појасот Газа, најмалку четворица Палестинци се убиени во израелски воздушен напад врз дом во населбата Тел ал-Султан, во западниот град Рафа, според медицински извори.
- Израелски напади на Појасот Газа
Израел започна смртоносна воена офанзива врз Појасот Газа со неселективно бомбардирање на цивилни населби, училишта, верски објекти и болници по нападот на палестинската група Хамас на 7 октомври.
Тел Авив вели во тој напад се убиени речиси 1.200 Израелци, но според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.
„Ханибалов протокол“ е контроверзна процедура што ја користат израелските одбранбени сили со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“.
Скоро 33.800 Палестинци, главно жени и деца, оттогаш се убиени во Газа, а над 76.000 се повредени во услови на масовно уништување и недостиг на неопходни работи.
Израел воведе целосна блокада на Појасот Газа, оставајќи го неговото население, особено жителите на северна Газа, на работ на гладување.
Израелската војна принуди 85 отсто од населението на Појасот Газа внатрешно да се расели, предизвика акутен недостиг на храна, чиста вода и лекови, додека 60 отсто од инфраструктурата на енклавата се оштетени или уништени, според податоците на Обединетите нации.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
