Mohammad Sıo
03 Ноември 2025•Ажурирај: 05 Ноември 2025
ЕРУСАЛИМ / ИСТАНБУЛ (АА) – Израелската полиција ги уапси поранешната главна воена обвинителка Јифат Томер-Јерушалми и пензионираниот полковник Матан Соломеш, поранешен главен воен обвинител, во рамки на истрагата за протекување на видеоснимка во јавноста на која се прикажува како израелски војници брутално тепаат врзан палестински затвореник во воениот затвор Сде Теиман, на југот на Израел, јавија локалните медиуми денес, пренесува Анадолу.
Според јавниот сервис КАН, Томер-Јерушалми е уапсена под сомнение за попречување на правдата и злоупотреба на службената должност. По нејзиното сослушување, полицијата ќе одлучи дали ќе бара продолжување на нејзиниот притвор.
Таа е обвинета дека ја попречувала истрагата, откривала доверливи информации и дека дала лажно сведочење во врска со објавувањето на видеото. Полицијата тврди дека таа лажела двајца началници на Генералштабот, Врховниот суд, обвинети и јавноста.
КАН објави дека текстуалните пораки и сведоштвата што ги поседува полицијата укажуваат дека Соломеш знаел дека Томер-Јерушалми стои зад објавувањето на видеото, но не го пријавил тоа кога била започната внатрешна истрага.
Весникот „Једиот ахронот“ објави дека полицијата побарала петдневно продолжување на притворот на Соломеш во рамки на истрагата.
Томер-Јерушалми поднесе оставка во петокот, завршувајќи го својот мандат започнат во 2021 година, по скандалот околу тоа кој го објавил видеото што предизвика локална и меѓународна осуда и повици за затворање на контроверзниот затвор Сде Теиман.
Во писмото со оставка, објавено во весникот „Хаарец“, таа наведе: „Јас го одобрив објавувањето на материјалот во медиумите за да се спротивставам на лажната пропаганда против воениот правосуден систем.“
Таа додаде дека презема целосна одговорност за секој материјал што завршил во јавноста.
Весникот наведува дека познати десничарски претставници продолжиле да ја напаѓаат по објавувањето на видеото.
Министерот за одбрана Израел Кац изјави дека Томер-Јерушалми нема да се врати на функцијата „поради сериозноста на сомнежите“ и најави назначување привремен заменик и отпочнување постапка за именување нов главен воен обвинител.
Министерот за национална безбедност, Итамар Бен-Гвир, на платформата Tелеграм напиша дека Томер-Јерушалми е ставена под строг надзор во притвор „за нејзина безбедност“.
Премиерот Бенјамин Нетанјаху изјави во неделата дека случајот на злоупотреба во Сде Теиман е „најштетниот за имиџот на Израел и на неговата армија“.
Видеото што протече во јавноста, објавено во август 2024 година, прикажува војници кои стојат околу врзан палестински затвореник, кој лежи со лицето кон земја, додека тие го удираат со штитови за сузбивање нереди.
Затвореникот, чиј идентитет не е објавен, подоцна бил хоспитализиран со тешки повреди.
Во февруари, воените обвинители подигнале обвинение против петмина војници поради нападот. Според обвинението, тие го претепале затвореникот на 5 јули 2024 година, предизвикувајќи му повеќе скршеници и внатрешни повреди.
Судот наложил забрана за објавување на имињата на обвинетите, кои во моментов не се во притвор и не се подложени на никакви ограничувачки мерки.
Според палестинските и израелските организации за човекови права, повеќе од 10.000 Палестинци моментално се држат во израелските затвори, меѓу нив жени и деца, кои се соочуваат со тортура, глад и медицинско занемарување, при што неколкумина затвореници починале во притвор.
