Зеленски: „Украина ќе инсистира на меѓународна истрага за авионската несреќа во рускиот регион Белгород“

МОСКВА (АА) – Украинскиот претседател Владимир Зеленски изјави дека ќе инсистира на меѓународна истрага за авионската несреќа на 24 јануари во рускиот регион Белгород, на авионот што превезувал украински воени заробеници за размена, пренесува Анадолу.

Во соопштението на Телеграм, Зеленски рече дека ги повикал шефовите на војската и разузнавањето на Украина поради инцидентот, додавајќи дека безбедносната служба на Украина ги истражува сите околности.

„Очигледно е дека Русите си играат со животите на украинските заробеници, со чувствата на нивните роднини и со емоциите на нашето општество. Мора да се утврдат сите јасни факти. Авионот се урна на руска територија – надвор од наша контрола. 'Факти' е клучниот збор сега“, нагласи тој.

„Му наложив на министерот за надворешни работи на Украина да им ги достави на нашите партнери информациите со кои располага Украина. Нашата држава ќе инсистира на меѓународна истрага“, рече тој.

Руското Министерство за одбрана вчера ја обвини Украина дека го соборила авионот со заробени украински војници за размена.

Во авионот имало 65 заробени украински војници, шест членови на екипажот и тројца придружници. Екипажот и сите патници во авионот загинаа, се вели во соопштението, нарекувајќи го она што се случило „терористички напад“ организиран со цел да се обвини Русија за убиството на украинските војници.

Украинските власти „добро знаеле за планираниот транспорт“ однапред, нагласи Министерството.