Зеленски: Украина нема да учествува во разговорите меѓу Русија и САД во Саудиска Арабија

МОСКВА (АА) - Украинскиот претседател Владимир Зеленски денес изјави дека Киев нема да учествува во разговорите меѓу Русија и Соединетите Американски Држави (САД) закажани за утре, 18 февруари, во Саудиска Арабија, а ниту ќе признае какви било исходи во врска со Украина, јавува Анадолу.

Говорејќи за украинските новинари во Абу Даби преку онлајн прес-конференција, Зеленски изјави дека Киев не бил информиран за состанокот.

„Украина нема да учествува. Украина не е информирана за оваа средба. Секакви преговори за Украина без Украина се бесмислени. Не можеме да признаеме какви било договори направени за нас без наше учество и нема да прифатиме такви одлуки“, нагласи тој.

Тој посочи дека отсуството на Украина може да се должи на тоа што Москва и Вашингтон се фокусираат на билатерални прашања, додавајќи: „Да бидам искрен, тие разговараат долго време. Сега единствена разлика е што тоа го прават јавно.“