Зеленски: Украина бара безбедносни гаранции од САД за период од 30 до 50 години

МОСКВА (AA) – Украинскиот претседател Владимир Зеленски денес изјави дека побарал од американскиот претседател Доналд Трамп да ја разгледа можноста Соединетите Американски Држави (САД) да ѝ обезбедат на Украина безбедносни гаранции во траење од 30 до 50 години, јавува Анадолу.

Трамп, според Зеленски, рекол дека ќе „размисли за“ предлогот.

Украинскиот претседател, сепак, рече дека според сегашните договори, Киев „дефинитивно“ ќе добие безбедносни гаранции од САД за период од 15 години.

Тој додаде дека Украина очекува следната рунда разговори со САД да се одржат во Киев во јануари.

„(Шефот на Советот за национална одбрана и безбедност на Украина) Рустем Умеров веќе го координира овој процес со партнерите. По состанокот, планирани се преговори меѓу европските лидери и Украина, усогласување на клучните документи и подготовка на контакти меѓу Трамп и европските лидери“, рече Зеленски на прес-конференција со американскиот претседател Доналд Трамп во Мар-а-Лаго, Флорида.

Според него, Трамп го информирал дека со рускиот претседател Владимир Путин разговарал за својот мировен план од 20 точки и дека рускиот претседател е подготвен за мир.

„Не сакам сега да навлегувам во детали. Но му реков на претседателот дека за нас е важно зборовите да се совпаѓаат со делата“, рече Зеленски.

На прашањето за можноста за укинување на воената состојба во Украина, тој истакна дека тоа може да се случи само по „појавата на реални безбедносни гаранции“, вклучително и распоредување на странски трупи.