Зеленски тврди дека приходите од нафта на Русија се намалени за 37 милијарди долари поради санкциите

ИСТАНБУЛ (АА) – Украинскиот претседател Владимир Зеленски денес изјави дека приходите на Русија од нафта и гас нагло се намалиле поради координираните меѓународни санкции, што резултирало со загуба од најмалку 37 милијарди долари во државниот буџет оваа година, јавува Анадолу.

Повикувајќи се на извештајот на шефот на Службата за надворешно разузнавање, Олег Ивашченко, Зеленски рече дека за првпат од почетокот на војната е забележан „значителен пад“ во производството и преработката на нафта во Русија.

„Приходите од нафта и гас во рускиот буџет се намалуваат, а до крајот на оваа година Русија ќе има загубено најмалку 37 милијарди долари од овие приходи“, изјави тој на Телеграм, додавајќи дека руските енергетски компании губат „уште десетици милијарди“.

​​​​​​​Тој нагласи дека санкциите „делуваат ефикасно“, истакнувајќи дека руската нафтена флота сега користи „помалку танкери“ како резултат на „целосно оправданите правни удари“ од страна на партнерите на Украина.

Руските власти засега не коментираа за тврдењата за загуби.

Украина и нејзините западни сојузници повеќепати воведоа санкции насочени кон рускиот енергетски сектор од почетокот на војната во 2022 година.