Европа: Екстремните временски услови за 40 години усмртија до 145.000 лица

АНКАРА

Екстремните временски услови низ Европа зедоа до 145.000 животи во последните четири децении, се наведува во извештајот на Европската агенција за животна средина (EEA), пренесува Агенција Анадолија (АА).

Извештајот прецизира дека екстремните временски услови како бури, топлотни бранови и поплави предизвикале меѓу 85.000 и 145.000 смртни случаи низ Европа од 1980 до 2020 година.

„Исто така, катастрофите поврзани со климата ја чинеа Европа околу половина билион евра“, се вели во извештајот на ЕЕА објавен вчера.

Топлотните бранови се водечката причина за смртните случаи поврзани со временските услови, со повеќе од 85 отсто од вкупниот број.

Повеќето смртни случаи се предизвикани од топлотниот бран што се случи во 2003 година, кој сочинува меѓу 50 и 75 отсто од сите смртни случаи.

„Слични топлотни бранови по 2003 година предизвикаа значително помалку смртни случаи бидејќи земјите презедоа чекори за намалување на разорните ефекти“, се вели во извештајот.

Извештајот опфаќа 32 земји членки на Европската агенција за животна средина, вклучувајќи ги сите 27 земји членки на ЕУ, како и Норвешка, Швајцарија, Турција, Исланд и Лихтенштајн.

Секоја година Европа се соочува со економски загуби и смртни случаи поради екстремните временски и климатски прилики.