Rania R.a. Abushamala
20 Февруари 2025•Ажурирај: 21 Февруари 2025
КУДС (ЕРУСАЛИМ) (АА) – Д-р Хусам Абу Сафија, директор на болницата „Камал Адван“ во Беит Лахија, во северниот дел на Појасот Газа, изјави дека не знае кои се обвинувањата против него, ниту зошто е уапсен, јавува Анадолу.
Тој ја даде оваа изјава во интервјуто со новинарот Јоси Ели од израелскиот Канал 13, кое беше емитувано синоќа.
Тоа беше негово прво појавување во јавноста од моментот на апсењето од страна на израелската армија во декември. Тој беше снимен во затворот „Офер“ на окупираниот Западен Брег, со пребледено лице и со синџири на рацете и нозете.
Абу Сафија стана познат по своите хуманитарни напори за време на израелскиот геноцид во Газа и беше еден од водечките лекари што продолжија да работат под постојани бомбардирања за да ги спасат ранетите.
Израелските сили го уапсија кон крајот на декември откако ја нападнаа болницата „Камал Адван“, присилно носејќи го со закана со оружје откако установата беше уништена и оневозможена да работи.
Со ескалацијата на израелскиот геноцид Абу Сафија доживеа голема лична загуба кога неговиот син Ибрахим беше убиен во израелскиот напад врз болницата на 26 октомври.
На 24 ноември 2024 година Абу Сафија беше повреден во израелски воздушен напад врз болницата, но одби да ја напушти установата и продолжи да ги лекува пациентите и повредените.
Во интервјуто со израелскиот новинар тој изјави: „По професија сум педијатар и работев како привремен заменик-лекар во болницата 'Камал Адван'.“
Палестинскиот лекар негираше дека некогаш видел или лекувал израелски затвореници во болницата.
Тој, исто така, демантираше дека палестински милитанти таму добивале медицинска помош, истакнувајќи дека оние што се лекувале во нивната установа биле обични цивили.
Абу Сафија повтори дека не знае зошто бил уапсен или какви обвиненија му се припишуваат, додавајќи: „Не знам зошто сум тука. Не знам.“
Во објавата на неговиот официјален профил на социјалната мрежа X семејството на Абу Сафија реагираше на неговото појавување со синџири на рацете и нозете во израелскиот затвор.
„Снимката што ја емитуваше израелската медиумска куќа со нашиот татко, д-р Хусам Абу Сафија, директор на болницата 'Камал Адван', е уште еден облик на психолошки тероризам што се надоврзува на тортурата што ја претрпел во последните два месеца“, се вели во соопштението.
Семејството тврди дека снимката „претставува јасна медиумска манипулација преку извртување на неговите изјави“.
„Кога беше прашан за израелските затвореници, тој одговори дека е педијатар. Сепак, неговиот одговор беше намерно преформулиран и изопачен, иако тој целосно ги демантираше сите обвинувања против него“, додаде семејството.
„Ние, семејството на д-р Хусам Абу Сафија, одбиваме која било медиумска куќа да ја објавува снимката без да го осуди психолошкиот тероризам и без да ја разоткрие манипулацијата на неговите изјави“, потенцираа роднините.
„Глетката на нашиот татко во синџири и неможноста да се движи треба да биде повик за итна и континуирана акција за да се обезбеди негово итно ослободување“, додава семејството.
Израелскиот весник „Једиот Ахронот“ во саботата објави дека Абу Сафија е меѓу палестинските затвореници што треба да бидат ослободени во рамките на првата фаза од договорот за прекин на огнот и договорот за размена на затвореници меѓу Израел и палестинската група Хамас.
