Oktaj Omeragikj
15 Април 2025•Ажурирај: 16 Април 2025
ЊУЈОРК (АА) - Демонстранти во знак на поддршка на Палестина, придружени од еврејски активисти, протестираа пред седиштето на американската Служба за имиграција и царина (ICE) во Њујорк, барајќи да биде ослободен Махмуд Халил и да се стави крај на бруталната војна што Израел ја спроведува во Газа, известува Анадолу.
Еврејските активисти носеа транспаренти на кои пишуваше „Евреите велат егзодус од ционизмот“, „Евреите за слобода на Палестинците“, „Спротивставувањето кон фараоните е еврејска традиција“, „Никој од нас не е слободен додека сите не бидеме слободни“, „Нема ICE, нема фашизам, нема геноцид“, „Евреите велат - Престанете да го вооружувате Израел“, „Јас сум Евреин, се залагам за слобода, стојам покрај Палестина“. Тие на земја поставија транспарент во кружна форма, импровизирајќи маса, во знак на празникот Пасха Седер. (Пасха го одбележува егзодусот на Израелците од Египет за време на божјиот пратеник Мојсеј и се смета за еден од најважните празници во еврејскиот верски календар. За време на Пасха симболично се подготвува свечена вечера на која се прераскажуваат моменти од последната вечер пред бегството. Собирањето околу празничната трпеза се нарекува седер - ред, поредок).
- Над 500 студентски визи се поништени во рамките на поширока акција за депортации
Си-ен-ен анализираше судски документи, изјави од адвокати и соопштенија од над 80 универзитети низ САД, потврдувајќи дека годинава на повеќе од 525 студенти, универзитетски професори и истражувачи им биле поништени визите.
Меѓу првите широко познати случаи е оној на Махмуд Халил, кој беше уапсен по учеството во пропалестинските протести на Универзитетот Колумбија.
Адвокатите за имиграција, пак, предупредуваат дека се зголемува бројот на случаи во кои студенти добиваат закани за депортација поради мали прекршоци од пред неколку години или дури и без јасно објаснета причина.
