ВАШИНГТОН (AA) - Градоначалничката на Лос Анџелес, Карен Бас, синоќа прогласи полициски час во центарот на градот во обид да спречи уште една ноќ на судири меѓу демонстрантите кои се противат на имиграциските рации на претседателот Доналд Трамп и безбедносните сили, јавува Анадолу.

„Прогласив полициски час што започнува вечерва во 20 часот за центарот на Лос Анџелес, со цел да се спречат злоупотребите од страна на лица кои ја користат хаотичната ескалација предизвикана од претседателот​​​​​​​. Ако не живеете или работите во централниот дел, избегнувајте ја областа“, напиша Бас на социјалната мрежа X.

„Полицијата ќе ги приведе сите кои ќе го прекршат полицискиот час и тие ќе бидат кривично гонети.“

„Полицискиот час ќе трае до 6 часот наутро по локално време в среда, а ќе биде на сила неколку дена“, соопшти Бас на посебна прес-конференција.

Претходно Трамп вети дека ќе го „ослободи“ вториот по големина американски град, говорејќи пред војниците во базата Форт Браг, Северна Каролина.

Тој ги нарече протестите предизвикани од неговата масовна депортациска кампања „целосен напад врз мирот, јавниот ред и националниот суверенитет, извршен од страна на бунтовници кои носеа странски знамиња, а кои сакаат да продолжат со странската инвазија на нашата земја“.

Трамп исто така изјави дека гувернерот на Калифорнија, Гевин Њусом, и градоначалничката Бас се „некомпетентни и дека платиле на поттикнувачи и бунтовници. Тие се дел од намерен обид да се поништат федералните закони и да се дозволи окупација на градот од страна на криминални натрапници“.

Кога новинарите го прашаа за овие обвинувања, Трамп се обиде да ги повлече изјавите, велејќи: „Не реков дека гувернерот или градоначалничката ги плаќаат. Реков дека некој мислам дека ги плаќа. А ако не ги плаќаат, тогаш се само поттикнувачи. Што да ви кажам? Но верувам дека некој ги плаќа“.

Претседателот распореди околу 4.000 припадници на Националната гарда и 700 маринци на улиците на Лос Анџелес, и покрај предупредувањата од Њусом и Бас дека оваа акција само ќе ги влоши тензиите.

Федерален судија го одби барањето на Њусом за привремена забрана на, како што тој ја нарече, „нелегалната милитаризација на Лос Анџелес“. Наместо тоа, високиот окружен судија Чарлс Брејер од Северниот Округ на Калифорнија закажа рочиште за четврток.

Протестите започнаа во петокот, кога агентите на Службата за имиграција и царина (ИЦЕ) извршија рации во локалните бизниси и приведоа стотици луѓе осомничени дека живеат нелегално во САД. Администрацијата на Трамп продолжува со рациите и покрај жестокото противење од локалната заедница.

Критичарите тврдат дека ИЦЕ има за цел мирни имигранти без документи кои се важен дел од заедницата и локалната економија, наместо криминалците што Трамп вети дека ќе ги депортира за време на неговата претседателска кампања минатата година.