Германскиот канцелар Мерц: „Немаме причина да ги критикуваме Израел или САД за воздушните напади врз Иран“

БЕРЛИН (АА) - Германскиот канцелар Фридрих Мерц денес изрази силна поддршка за Израел и САД во врска со нивните воздушни напади врз иранската нуклеарна програма и ракетни капацитети, јавува Анадолу.

Говорејќи на настан организиран од Федерацијата на германската индустрија (БДИ) во Берлин, Мерц истакна дека неговата Влада работи на справување со надворешните политички предизвици, особено поради новата ескалација на Блискиот Исток.

„Сакам повторно јасно и недвосмислено да кажам: Нема причина ние – а ни јас лично – да го критикуваме она што Израел го започна пред една недела ниту има причина да го критикуваме она што САД го направија изминатиот викенд“, рече Мерц.

„Да, ова не е без ризик, но да се остават работите како што беа, исто така, не можеше да биде опција“, додаде тој.

Изјавата на конзервативниот лидер следува откако претходно во јавноста рече дека Израел ја врши „валканата работа“ за западните земји преку своите воени акции против иранската нуклеарна програма, што, според него, претставува закана не само за Израел, туку и за регионот и Европа.

Опозициски политичари остро го критикуваа ставот на Мерц, оценувајќи дека израелските напади не може да се оправдаат како „превентивна самоодбрана“ и дека претставуваат прекршување на меѓународното право - нешто што германските влади досега секогаш го осудувале во слични конфликти.