Oliver Towfigh Nia
17 Декември 2025•Ажурирај: 18 Декември 2025
БЕРЛИН (АА) – Германска црковна организација која ги претставува и Католичката и Протестантската црква денес повика на запирање на извозот на оружје за Израел, предупредувајќи дека кревкиот прекин на огнот во Појасот Газа не обезбедува доволни гаранции против можни прекршувања на меѓународното хуманитарно право, јавува Анадолу.
Заедничката конференција „Црква и развој“ ја повика германската Влада да не му испорачува на Израел никаква воена опрема што би можела да се користи во Појасот Газа, дури и по прогласениот, како што беше оценет, многу кревок прекин на огнот од 10 октомври, сè додека ситуацијата не се стабилизира доволно и не исчезне јасниот ризик таквата опрема да биде употребена во сериозни прекршувања на меѓународното хуманитарно право.
Копретседателот на организацијата, Карл Јустен, ја критикуваше одлуката на Берлин за обновување на испораките на оружје, оценувајќи ја како прерана.
Тој нагласи дека начинот на кој Израел ја води војната во Појасот Газа во многу аспекти не е усогласен со барањата на меѓународното хуманитарно право, особено во однос на третманот на цивилното население.
Германија на 17 ноември соопшти дека ќе ги укине ограничувањата за извоз на оружје за Израел, повикувајќи се на, како што наведе, „стабилизиран прекин на огнот“ во Газа и на неодамнешен дипломатски напредок во регионот.
Канцеларот Фридрих Мерц ги воведе ограничувањата на 8 август, со што беше стопирано одобрувањето на извоз на оружје што би можело да се користи во војната во Газа. Одлуката следуваше по најавата на Израел за целосна копнена офанзива и запирањето на доставата на хуманитарна помош во енклавата.
Извозот на германско оружје за Израел со години е предмет на контроверзии и правни постапки подигнати од организации за човековите права и жители на Газа.
Европскиот центар за уставни и човекови права, кој ги поддржа тужителите, повеќепати соопшти дека одобрувањето на испораки на оружје од страна на Берлин ги прекршува меѓународните договори што Германија ги има потпишано, вклучително и Женевската конвенција за спречување и казнување на злосторството геноцид.
Палестинците го обвинуваат Израел за повеќекратно прекршување на договорот за прекин на огнот во Газа. Според Министерството за здравство во Газа, најмалку 393 лица се убиени, а 1.074 се повредени во израелските напади од почетокот на прекинот на огнот.
Од октомври 2023 година, во израелските напади во Газа се убиени повеќе од 70.000 Палестинци, главно жени и деца, а над 171.000 се повредени, при што поголемиот дел од енклавата е разурнат.
