Ayhan Şimşek
14 Февруари 2025•Ажурирај: 14 Февруари 2025
БЕРЛИН (АА) - Германскиот министер за одбрана, Борис Писториус, денес остро го критикуваше американскиот потпретседател Џеј Ди Венс кој рече дека европските влади спроведуваат антидемократски политики и ги потиснуваат клучните гласови, јавува Анадолу.
На Минхенската безбедносна конференција, Писториус цврсто го отфрли тврдењето на Венс дека европските земји ги напуштаат демократските принципи.
„Морам да одговорам на говорот што го слушнавме претходно од американскиот потпретседател“, рече германскиот социјалдемократ, додавајќи дека иако европските демократи заземаат цврст став против десничарскиот екстремизам, тие остануваат целосно посветени на основните права и слободи.
„Венс говори за поништување на демократијата и, ако добро го разбрав, тој ја споредува ситуацијата во делови од Европа со онаа кај авторитарните режими. Дами и господа, тоа не е прифатливо“, рече Писториус.
Нагласи дека во германската демократија секое мислење има глас, а крајно десничарските партии како АфД и денеска продолжуваат со изборните кампањи, исто како и другите партии.
„Доколку американскиот потпретседател го вклучил телевизорот кога пристигна вчера, во ударниот термин на германската телевизија ќе видеше водечки кандидат од оваа партија“, рече германскиот министер.
Во жестокиот говор на конференцијата претходно денес, Венс ги критикуваше европските политичари, институции и судови за, како што рече, назадување од демократските принципи.
Венс посебно го критикуваше неодамнешното поништување на резултатите од претседателските избори во Романија, тврдејќи дека тоа ги поткопува демократските темели.
Тој, исто така, изрази загриженост поради исклучувањето на крајната десница АфД од политичките процеси во Германија, тврдејќи дека таквите акции покажуваат вознемирувачки тренд на европските земји за отфрлање на волјата на своите граѓани.
