Ayhan Şimşek
25 Септември 2018•Ажурирај: 25 Септември 2018
БЕРЛИН (АА) - Германската католичка црква денес упати извинување до жртвите на сексуалното злоставување од страна на свештениците, јавува Anadolu Agency (AA).
Кардиналот Рајнхард Маркс, претседател на Конференцијата на германски епископи, на прес-конференцијата во Фулда изјави дека во неодамнешната истрага се откриени стотици случаи на сексуално злоставување на децата.
„Долго време црквата го негираше тоа, ја избегнуваше темата и ги прикриваше злоставувањата. Се извинувам за тоа и за сета болка“, изјави тој.
Четиригодишната истрага, чии откритија беа објавени денес од црквата, покажа дека црковните лидери прикривале случаи на сексуално злоставување од страна на најмалку 1.670 свештеници во периодот од 1946 до 2014 година.
Истрагата покажа дека најмалку 3.677 деца биле подложени на сексуално злоставување.
Кардиналот Маркс вети дека на Конференцијата на епископите оваа недела ќе се дискутира за можните реформи за да се обезбеди дека ваквите инциденти нема да се случат повторно.
