Burak Bir
15 Септември 2022•Ажурирај: 16 Септември 2022
АНКАРА (АА) - Седумдесет и еден азербејџански војник ги загубија животите во судирите предизвикани од провокациите на Ерменија во последните денови, соопшти Министерството за одбрана на Азербејџан, пренесува Агенција Анадолија (АА).
Министерството објави дека за време на судирите загинале 71 азербејџански војник, додека вчера, премиерот на Ерменија, Никол Пашинјан, соопшти дека во судирите загинале 105 ерменски војници.
По повторното разгорување на судирите во регионот, Туркије ја повтори својата поддршка за Азербејџан.
Вчера, турскиот претседател Реџеп Таип Ердоган рече дека најновите погранични тензии се резултат на прекршувањето на договорот од ноември 2020 година од страна на Ерменија, со кој заврши војната во Карабах, што резултира со победа на Азербејџан, и додаде дека тоа е неприфатливо.
Односите меѓу поранешните советски републики се тензични од 1991 година, кога ерменската војска го окупира Нагорно-Карабах, територија меѓународно признаена како дел од Азербејџан.
Есента 2020 година Азербејџан ослободи неколку града и над 300 населби и села кои беа окупирани од Ерменија, а борбите завршија со договор постигнат со посредство на Русија.
