Во Рафа влезе првиот комерцијален конвој камиони откако Израел ја презеде контролата врз преминот

ГРАДОТ ГАЗА (АА) - Педесет и два комерцијални камиони пристигнаа во градот Рафа, во јужниот дел на Газа, доцна синоќа преку преминот Керем Шалом од Израел, соопштија за Анадолу палестински безбедносни извори.

Ова е првпат камиони да влезат во градот од 7 мај, кога израелската војска ја презеде контролата врз палестинската страна на граничниот премин со Египет, Рафа.

Изворите, кои сакаа да останат анонимни, рекоа дека камионите, со стока за приватниот сектор, влегле од Израел преку преминот Керем Шалом за прв пат од почетокот на израелската воена операција во Рафа.

Тие истакнаа дека камионите поминале низ преминот Керем Шалом во југоисточниот дел на енклавата, ја поминале граничната линија што ги дели Појасот Газа и Египет и стигнале до населбата Тел ал-Султан во западниот дел на Рафа.

Важно е да се напомене дека камионите не носат никаква помош, туку стока што им припаѓа на палестинските трговци во Појасот Газа, додаваат тие.

Минатата недела, израелската војска започна инвазија на источниот дел на Рафа и ја зазеде палестинската страна на преминот Рафа, витална рута за хуманитарната помош во Појасот Газа, кој е под целосна израелска блокада од минатиот октомври, оставајќи го целото население на територијата на работ на гладување.

Израел започна брутална воена офанзива врз Појасот Газа со неселективно бомбардирање на цивилните населби, училишта, верски објекти и болници по нападот на палестинската група Хамас на 7 октомври.

Оттогаш во нападите на Израел врз Појасот Газа убиени се повеќе од 35.180 Палестинци, главно деца и жени, а повеќе од 79.000 се повредени во услови на масовното уништување и големиот недостиг на неопходни средства за живот.

Хамас бара прекин на израелската воена офанзива на Појасот Газа во замена за каква било размена на заложници со Тел Авив.

Повеќе од седум месеци од почетокот на израелската војна, огромни делови од Газа се во урнатини, а постои и блокада на храна, чиста вода и лекови.

Израел е обвинет за геноцид пред Меѓународниот суд на правдата (МСП). Во привремената пресуда во јануари се вели дека е „веродостојно“ дека Тел Авив врши геноцид во Газа, наредувајќи му да ги запре таквите акти и да преземе мерки за да гарантира дека хуманитарната помош ќе стигне до цивилите во енклавата.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.