Во новите израелски напади на Појасот Газа убиени петмина Палестинци

ГАЗА (АА) - Во новите воздушни напади на израелската војска врз Појасот Газа убиени се петмина Палестинци, известува Анадолу.

Еден Палестинец е убиен, а четворица се ранети во израелскиот напад на куќа во бегалскиот камп Ал-Мегази, во централниот дел на Појасот Газа.

Во нападот на израелската војска на куќа во центарот на градот Рафа, на југот од Појасот Газа, убиени се четири лица, а голем број се ранети.

Загинатите и повредените се пренесени во болницата Абу Јусур ен-Наџар.

Судири настанаа и меѓу израелските сили и палестинските групи и околу болниците Ан-Наср и Рантиси во округот Ан-Наср, во северозападниот дел на градот Газа.

Ова утро заврши хуманитарната пауза што во рамките на договорот меѓу Израел и Хамас стапи на сила на 24 ноември, петок.

По завршувањето на хуманитарната пауза, израелските воени авиони започнаа да бомбардираат разни делови на Појасот Газа.