Во куќа во Австралија пронајдени 5 мртви лица, од кои 3 деца

МЕЛБУРН (АА) - Во куќа во австралискиот град Перт се пронајдени мртви мајка, нејзините три деца и нивната баба, јавува Anadolu Agency (AA).

Полицијата на Западна Австралија информираше дека во предградието Бедфорд во австралискиот град Перт, во куќа се пронајдени мртви близначки стари 2 години, нивната 3,5-годишна сестра, нивната 47-годишна мајка и 74-годишната баба.

Полицијата потврди дека жртвите се убиени, информирајќи дека пред суд е изведено 24-годишно момче, за кое постои сомневање дека е извршител на ова грозоморно убиство. Полицијата не го објави идентитетот на осомничениот.

По настанот, осомничениот сам ѝ се предал на полицијата, давајќи изјава. Полицијата не даде подетални информации околу поврзаноста или роднинската врска на осомничениот со жртвите.

Според локалните медиуми, осомничениот живеел во истата куќа со жртвите.

Заменик-шефот на полицијата на Западна Австралија, Пол Стил Пол, изјави дека во тек е испитувањето на осомничениот. Стил не даде детали околу начинот на кој се убиени жртвите. „Ова не е трагедија само за роднините и пријателите на жртвите, во исто време тоа е трагедија и за членовите на екипите за прва помош кои први интервенирале“, изјави Стил.

- Трет случај од месец мај наваму -

Во населбата Осмингтон во градот Маргарет Ривер, во Западна Австралија, во куќа беа пронајдени телата на 7 лица, од кои 4 деца. Во трагичниот случај што се случи во мај годинава, убиени беа дедо, баба, нивната ќерка и 4 внучиња.

Во јули, во една куќа во Еленбрук, северно од Перт, беа пронајдени мртви мајка со нејзините две деца, а како сторител на делото беше обвинет синот кој беше приведен.