Во земјотресот со јачина од 5,4 степени во Иран повредени 490 лица

ТЕХЕРАН (АА) - Најмалку 490 лица се повредени во земјотресот со јачина од 5,4 степени според Рихтеровата скала што ја погоди северозападната иранска покраина Западен Азербејџан во утринските часови денеска, соопштија здравствени власти, јавува Агенција Анадолија (АА).

Силниот потрес го погоди градот Хој, 807 километри северозападно од главниот град Техеран.

Според Иранскиот сеизмолошки центар на Универзитетот во Техеран, земјотресот се случил во 3:51 часот по локално време на длабочина од 10 километри, по што следувале повеќе од 30 последователни потреси со јачина помала од 4 степени.

„Многумина од повредените се примени во локалните болници во покраината“, изјави Мојтаба Халед, портпарол на Министерството за здравство.

Во локалните медиуми ги цитираа властите во Западен Азербејџан со информациите дека над 200 станбени објекти биле делумно или целосно оштетени од земјотресот, а спасувачки екипи биле испратени во најпогодените области.

„Експертските тимови во моментов го испитуваат и истражуваат степенот на штетата предизвикана од земјотресот и последователните потреси“, велат тие.

Иран се наоѓа во сеизмички активна зона и забележа многу катастрофални земјотреси во изминатите години.

Најразорниот земјотрес што ја погодил земјата во поновата историја се случи во 2013 година кога најмалку 34.000 луѓе загинаа во градот Бам во југоисточната покраина Керман. Земјотресот бил со јачина од 6,7 степени според Рихтеровата скала.

Во последните месеци, низа земјотреси со висок интензитет ја погодија покраината Хормозган во јужен Иран, оставајќи многу жртви и колатерална штета.

Во јули, најмалку 5 лица загинаа, а над 80 беа повредени кога земјотрес со јачина од 6,1 степен според Рихтер ја погоди покраината која излегува на Персискиот Залив.

Тоа се случи една недела по земјотресот со јачина од 5,6 степени според Рихтеровата скала што ја погоди истата покраина, иако тогаш немаше информации за жртви или голема материјална штета.