Во Газа од страна на израелските сили убиени се уште 35 Палестинци, вкупниот број надмина 44.200

АНКАРА (АА) - Уште најмалку 35 Палестинци се убиени во израелските напади во Појасот Газа, со што вкупниот број на убиени од октомври минатата година достигна 44.211, соопшти денес Министерството за здравство во енклавата, јавува Анадолу.

Министерството додаде дека во нападите досега повредени се најмалку 104.567 Палестинци.

„Израелските сили убија 35 лица и повредија 94 во четири масакри на семејства во последните 24 часа“, соопшти Министерството.

„Многу луѓе сè уште се заробени под урнатините и на патиштата бидејќи спасувачите не можат да дојдат до нив“, се додава.

Израелската армија ја продолжи геноцидната војна врз Појасот Газа по нападот на Хамас минатата година, и покрај резолуцијата на Советот за безбедност на Обединетите нации која повикува на итен прекин на огнот.

Меѓународното признавање на геноцидот во Газа се зголеми во втората година од израелските напади, кои организациите и лидерите ги означија како намерен обид за уништување на населението.

Во четвртокот, Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради неговата брутална војна во Газа.