ЛОНДОН (АА) - Суровото зимско време денес предизвика големи нарушувања низ Велика Британија, поради што се затворени стотици училишта и населените места се соочуваат со опасни услови, известува Анадолу.

Метеоролошката служба издаде повеќекратни временски предупредувања поради падот на температурите во текот на ноќта, а метеоролозите предупредуваат дека наредните часови може да има нови „снежни врнежи“. Дополнителни предупредувања за снег и мраз остануваат на сила низ Велика Британија.

Повеќе од 100 училишта се затворени во Североисточна Шкотска, а пријавени се дополнителни затворања во Англија и Велс, објави Би-би-си.

Локалните власти наведоа дека поради замрзнатите патишта и обилните снежни врнежи патувањата не се безбедни, а некои училишта не може да се отворат поради проблеми со греењето предизвикани од прекините на електричната енергија.

Во Западен Велс стотици домови остануваа без електрична енергија по студеното време и снегот што падна во текот на ноќта.

Построго предупредување за снег е дадено за делови од Северна Англија, особено за Северен Јоркшир, а се смета дека таму се можни прекини во сообраќајот и во електричната енергија.

Агенцијата за здравствена безбедност на Велика Британија издаде предупредување за ниски температури за неколку региони, посочувајќи на зголемени ризици за ранливите луѓе.

Издадени се три нови жолти предупредувања што ќе продолжат до петок бидејќи се очекува продолжување на студениот бран.

Синоќа беше најстудена ноќ сезонава во Англија, Велс и Северна Ирска. Температурите паднаа до -6,6 Целзиусови степени во Бенсон, Оксфордшир, а низ целата земја беше пријавен широко распространет мраз.