Високиот советник на Бајден во Бејрут на разговори за намалување на тензиите долж либанско-израелската граница

БЕЈРУТ (АА) - Високиот советник на американскиот претседател Џо Бајден, Амос Хохштајн, пристигна денес во либанската престолнина Бејрут во непланирана посета по посетата на Израел за да разговара за напорите за намалување на тензиите по должината на либанско-израелската граница, пренесува Анадолу.

Државната либанска Национална новинска агенција објави дека Хохштајн пристигнал на меѓународниот аеродром „Рафик Харири“ во Бејрут и ќе се сретне со премиерот Наџиб Микати напладне. Другите состаноци допрва треба да се закажат.

„Хохштајн ќе разговара за начините за ставање крај на конфликтот меѓу Израел и Хезболах“, објавија локалните медиуми.

За време на посетата на Израел тој се состана со највисоките израелски претставници, меѓу кои премиерот Бенјамин Нетанјаху и министерот за одбрана Јоав Галант.

Посетата доаѓа во екот на граничните судири меѓу Израел и Хезболах во Либан.

Од почетокот на војната во Газа во октомври минатата година секојдневно има размена на оган, а илјадници цивили се раселени од двете страни на границата.

Хохштајн одигра клучна улога во договорот за поморската граница на Израел и Либан, кој беше потпишан во октомври 2022 година.