Ватикан: Конклавата за избор на новиот папа ќе се состане на 7 мај

ЛОНДОН (АА) – Ватикан денес објави дека кардиналите од целиот свет следниот месец ќе се состанат на тајна конклава за избор на нов папа, по смртта на папата Франциск, јавува Анадолу.

Седницата зад затворени врати ќе започне на 7 мај во Систинската капела, на која ќе присуствуваат 135 кардинали.

Процесот на избор, вкоренет во традиција стара со векови, следува по смртта на папата Франциск, кој почина за време на велигденските празници.

Неговата погребна церемонија беше одржана во саботата.

Нема официјален временски рок за тоа колку долго може да трае конклавата, иако претходните два избора на папата - во 2005 и 2013 година - завршија за два дена.

Франциск е роден на 17 декември 1936 година во Буенос Аирес, Аргентина, во семејство на италијански имигранти.

Образованието го стекнал во Аргентина, а дел од студиите ги продолжил и во Германија, пред да биде ракоположен за свештеник на редот на језуитите во 1969 година.

Повеќе од една деценија како поглавар на Римокатоличката црква, папата Франциск остана фигура што предизвикува и восхит и контроверзии.

Тој се залагаше за реформи во ватиканската бирократија, борба против корупцијата и решавање на некои од најгорчливите предизвици со кои се соочува Црквата.

Папата беше примен во болница во Рим во февруари со бронхитис што се разви во пневмонија. Тој беше отпуштен по 38 дена за да продолжи со закрепнувањето во неговата резиденција во Ватикан.

Папата Франциск почина на 21 април на 88-годишна возраст.